Бу ый 15 күнүгэр Чөркөөхтөөҕү  П.А. Ойуунускай  аатынан Судаарыстыбаннас түмэлигэр П.В.Толстяков аатынан норуот тыйаатыра төрүттэммитэ 35 сылыгар аналлаах  «Норуот айар аартыга- ааспыт, билиҥҥи, кэлэр кэмнэргэ» диэн быыстапка аһылынна. Норуот тыйаатыра төрүттэниитигэр  сабыдыаллаабыт дьон – норуот өйүгэр сөҥөн хаалбыт бэлиэ түгэни  И.Я. Жерготова дьоҥҥо тириэртэ, ол – 1924 с. Ойуунускай дойдутугар тахса сырыттаҕына биир дойдулаахтара «Манчаары» испиэктээҕи оонньоон көрдөрөн соһуппуттар, үөрдүбүттэр. Үйэ аннараа өттүгэр суолталаах түгэн кыымтан сөҕүрүйбэт төлөннөнөн норуот тыйаатырын үөскэтэн күн бүгүн үлэлии, айа турара мустубут дьону долгутта.