Мин баайым-мин сааһым..

Бу дьыл алтынньы 16 күнүгэр нэһилиэкпитигэр Аҕам саастаах дьоммут – сэргэбит декадаларын түмүктүүр дьоро киэһэ тэрилиннэ. Ветеран сэбиэтин салайааччыта Л.П.Иванова, баһылык А.П.Семенов, орто оскуола директэри үөрэх чааһыгар солбуйааччыта А.Е.Никифоров эҕэрдэлээтилэр. Норуот тыйаатырын артыыстара М.Наумов ” Оҕустар забастовкалара” кэпсээнинэн инсценировканы, АОбоюкина, МГоголев сольнай ырыанан мустубут дьоҥҥо эҕэрдэ нүөмэрдэрин анаатылар. Истиҥ көрсүһүү, сэһэн – сэппэн киэһээтэ эдэр сааһы санатар куонкурустарынан, ырыанан- тойугунан киэркэйдэ. Минньигэс астаах сандалы тула олорон ырыа дуорайда. Тэрээһин силигин ситэрэн лотерея оонньуута сэргэхсийиини үөскэттэ. Үтүө киэһээҕэ Ийэм, эбээм мааны былаата диэн быыстапканы олохтоох библиотека үлэһитэ Т.А.Бодоготова тэрийбитэ сэҥээриини ылла. Мустубут аҕам саастаах дьоммут бэркэ астынан, өйдөбүнньүк хаартыскаларга түһэн, үҥкүүнү оройуттан тутан, ирэ – хоро сэһэргэһэн тарҕастылар.