Маастар кылаас кыттыылаахтара бастакы күн ыаҕыйа тигэр ситиини хатарга үөрэннилэр . Иккилии-үстүү салаанан эбэн ньилбэктэригэр хаттылар, сабынан туймуулаатылар. Синньигэс ситиини хатар олус уустук уонна бытаан үлэ буолан биир күн толору онно ананна.
Иккис күҥҥэ туос хастаатылар уонна талах быһан иэхтилэр. Билигин туос хастанар кэмэ тосхойон турар буолан сүрдээх кэбэҕэстик кэлэр. Ол эрэн, көнө, мутуга суох хатыҥы көрдөөн булуохха наада. Талаҕы эмиэ көнөтүн талан быһыллар. Быспыт талахтарын аҕалан бэйэлэрэ быһаҕынан кыһан иэхтилэр. Иэҕэргэ талах тосту, булгу барыа суохтаах.
Бастакы икки күҥҥэ Парасковья Татаринова үөрэппит эбит буоллаҕына үһүс күҥҥэ Туора Күөлтэн Петрова Марья Власьевна кыыһа, норуот уус-уран оҥоһугун маастара Валерия Потапова кэлэн тигэргэ үөрэттэ. Ыаҕыйа тигиитигэр ордук ыарахана түгэҕин тигии буолар. Валерия Николаевна тигэн көрдөрө-көрдөрө сиһилии быһааран, сүбэлээн истэ. Сарсыарда саҕалаан баран киэһэ хойукка диэри үлэ барда. Сөптөөх иннэ суоҕа үлэ хаамыытын бытаарта. Ол да буоллар сиппит үлэлэр таҕыстылар. Сорохтор дьиэлэригэр ситэрэ илдьэ бардылар. Маастар эдэр ийэлэр туттууларын-хаптыыларын, сииктэрин хайҕыы бэлиэтээтэ, салҕыы дьарыктаналларыгар сүбэлээтэ.
Маннык маастар кылаас элбэх киһини сатаан хаппат. Үөрэтэр киһиэхэ элбэх киһи сылаалаах буолар. Уонна дьиэбит-уоппут да кыараҕаһа бэрт. Онон биллэрбэтэхтэр диэн хомойбоккутугар көрдөһөбүт.
Үөрэппит-такайбыт маастарбытыгар Валерия Николаевна Потаповаҕа махталбытын тиэрдэбит.

















